صعدة برس-متابعات -
*كامل الخوداني
ليش دائماٌ تنتقد المؤتمر والقيادات المؤتمريه وبعض الشله اللي حوله.
..
تعرف ليش ياصاحبي.
– انتهازيين
-مصلحيين
-منافقين
-جبناء
-لصوص
-اشباه رجال
-اكلو الدوله واكلو صالح واسرته وسرقو لما قالو بس وبنو امبراطوريات ماليه وفلل وسيارات ومناصب وبفضل قربهم من صالح واسرة صالح وقعو شي وهم لاشي وبالنهايه
بعام 2011 لما شافوها حزقت عملو ساع ابليس قلبو انفسهم وطنيين وشرفاء ورفعو شعار كلنا شرفاء الا صالح ونفسي يارب نفسي .
نصفهم بعام فحطو الساحه اما للحفاظ على امبراطورياتهم الماليه او لحجز مقاعد بالفتره القادمه وغيرو المداكي من ديوان صالح ويحيى وطارق لا ديوان حميد وعلي محسن جزء منهم ظاهر والجزء الثاني من تحت لاتحت سكيتي
بعد طلوع هادي نقلو المداكي ديوان جلال وهات ياتخطيط وهات ياشتايم لصالح واسرته والساعه بخمسه جنيه والحسابه بتحسب .
بعد دخول انصار الله صنعاء نصف اللي تبقو عطفو السمان والتحقو بركب المسيره واقتلبو ملكيين اكثر من الملك ومانبالي مانبالي ونفس طريقة السابقين اللي كانو يتقربو لهادي بشتم صالح بيتقربو لأنصار الله بشتم صالح واسرته وهات ياتنظير ..
بعد عاصفة الحزم .
الواحد بعد الاول الرياض وخذني يابابور يابابور الساعه اثنعشر ياللي مسافر ع الرياض ومثلما كانو يقدسو صالح رجعو يشتموه واللي كان رافع شعار فداك ابي وامي ياصالح شاف مابش فايده غير الشعار فداك ابي وامي يامحمد بن سلمان والموت لصالح.
النصف الاخير . هربو الاردن ودول العالم وعواصمها وجالسين يصرفو من زلط صالح اللي كانو يسرقوها لما كان بالحكم وياليتهم حتى يقولو شكرا ياصالح ولو مجامله المهم ساكتين ومنتظرين الكره بملعب من عتصبح ان سبرت لصالح وانصار الله دقوها وطنيه وانهم كانو ضد العدوان بحكم انهم ماظهروش خالص وان سبرت لهادي والسعوديه قالو احنا لو كنا مع صالح والحوثيين ان ما خرجنا من البلاد وسكوتنا كان تكتيك واكشن ودراما بس.
ايوه يا اخي احتقرهم .
وحتى القيادات المؤتمريه اللي هاربه بالخارج وبالاردن وبعواصم العالم وما جلست تقاتل وتحارب وبدل مايصرفو مئات الالاف من الدولارات بالفنادق والمراقص كل واحد منهم يجند عشرين اربعين خمسين شخص من قبيلته واصحابه ويسلحهم ويصرف عليهم ويقول يالله احمو اليمن احتقرررهم ايوه احتقرهم ولافرق بينهم وبين اللي راحو الرياض .
– كان هكذا من بقيت ياجني .
بقيت المؤتمر الشعبي العام وانصار صالح ومحبيه الكادحين المساكين البسطاء اللي كانو مطحونين طحن ايام حكم صالح ومع هذا مستعدين يضحو بأرواحهم دفاع عن اليمن وعن صالح ومستعدين لو قده الصدق يقسمو اللقمه نصين بين جهالهم وبين صالح .
بقيت القيادات الوسطيه اللي ما احد عارف لهم ولاعمرهم طلعو بتلفزيون او ذكرت اسمائهم بقيت الاعلاميين والصحفيين المساكين الكادحين اعلاميين المؤتمر اللي نصفهم ميت جوع ورغم الاغراءات من عام 2011 لا اليوم اهون عليهم مايلاقو ايش ياكلو ولا يخونو او يتركو صالح والمؤتمر يجي اللي يجي يروح اللي يروح مكانهم ماتغيرو ولا مالو على العهد بقيت المؤتمريين الشرفاء الناشطين بالفيس وبالصفحات المقاتلين بالميادين المواطنين البسطاء اللي يحبو صالح لله في لله
__
بقيت الغلابا والشرفاء اللي بعضهم ماعمره شاف صالح الا بالتلفزيون واللي كانو يمشو رجل لا السبعين مامعاهم حتى كرى الباص هم هؤلاء اللي اراهن عليهم
__
بقيت الفلاح المسكين صاحب البلاد اللي كان معه عشرين راس غنم هن كل ثروته وكل جمعه عام 2011 يبيع واحد من شان يطلع السبعين يوقف مع صالح ويشتري صور صالح يروح البلاد يوزعهن على الناس ..
هولاء من بقيت اما الشله فصدقني ان طرحة العجوز اللي كانت تلصق صور صالح بعرضها بالسبعين اغلي منهم
__
– يعووه بتقول عليهم هكذا ومش خايف من الشله اللي عاد باقي داخل المؤتمر وجنب صالح يضروك ويحاربوك
اولاٌ…
مافيش معي مصلحه لا من صالح ولا من المؤتمر من شان يحاربوني عليها وقد يمكن ان الكثير منهم بيستفيدو من صالح ولا ظهري ومش بس متأكد واراهن مراهنه بينما عمري ما اعرف من صالح حتى جبه مليم او قرطاس زعقه على قولة واحد من البلاد رغم الاتهامات وهذا بيخليني كبير في نظري ومش مهتم .ولامعي من المؤتمر فايده الا علاقة الاحترام مع قياداته والسلام عليكم كيف حالك وهذا كمان يخليني ادعس برجل وازبط بالثانيه ولا مبالي مؤتمري دم وروح وجسد وعقل . لو مابقيت بالمؤتمر الا انا ايمان ومبدأ.
ثانياٌ..
كلهم هاربين بالخارج واللي بالداخل متخبيين يعني دوس ياكامل ولا تبالي من الطرف لا الوسط يجلسو يذموني وهم مخزنين هذاك سيء هذاك مش تمام واذا به حاجه شطبو اسمي من الكشف او يكتبوه وشلوها اذا هي حاجه سواء مثلما بيفعلو من زماااان اواذا به اجتماع او لقاء او معاهم لقاء ما يحاكونيش يعني ايش عيسوو بي ولا شي وبعدين صبرك لو تزيد تحزق شويه عيمذوها والهربه ولا عاد بحسهم لا مؤتمر ولا صالح ولا جدتي ويقع المؤتمر لي وعليا واكون اخزن انا وصالح الرجل جنب الرجل ونراجع كشوفات الصرفيات والحاجات اللي كان يصرفها لهم ونتحسر انا وهو هو يتحسر انه خليهم رجال واكلهم من لحم اكتافه قلوس ومناصب ومكانه وتجاره وهنجمه وطلعو مش رجال لا هم باللي حافظو على حكمهم ودولتهم ونظامهم وقاتلو من اجلها ولاهم باللي وقعو اوفياء مع صالح وتجملو من اللي سواه لهم وانا اتحسر على اسمي اللي عد اكون القيه بالكشوفات ولا وصلتني حاجه ..
ذلحين دريت ليش اشمئز منهم واسندفهم .
مش رجال .
وسلامتك .
للشرفاء .